ಅಣ್ಣ ಕೊಲೆ ಮಾಡಿದ ಎಂದು ತಂಗಿ, ಕೊಲೆ ಮಾಡಿರುವುದು ತಂಗಿ ಎಂದು ಅಣ್ಣ: ಹಾವೇರಿಯಲ್ಲಿ ತಂದೆಯ ಸಾವಿನ ಸುತ್ತ ಅನುಮಾನಗಳ ಗೂಡು

ಹಾವೇರಿ ಜಿಲ್ಲೆಯ ಸವಣೂರು ತಾಲೂಕಿನ ಶಿರಬಡಗಿ ಗ್ರಾಮದಲ್ಲಿ ನಡೆದ ಒಂದು ಘಟನೆ ಕುಟುಂಬ ಸಂಬಂಧಗಳಿಗಿಂತ ಆಸ್ತಿ ವಿವಾದವೇ ಎಷ್ಟು ಭೀಕರ ಮಟ್ಟಕ್ಕೆ ಹೋಗಬಹುದು ಎಂಬುದನ್ನು ತೋರಿಸಿದೆ. 75 ವರ್ಷದ ವೃದ್ಧ ಗುರುಬಸಪ್ಪ ಬಸಾಪುರ ಅವರ ಸಾವಿನ ಬಳಿಕ, ಅವರ ಪುತ್ರ ಮತ್ತು ಪುತ್ರಿಯರ ನಡುವೆ ತೀವ್ರ ಆರೋಪ-ಪ್ರತಾರೋಪಗಳು ಕೇಳಿಬಂದಿದ್ದು, ಪ್ರಕರಣ ಇದೀಗ ಪೊಲೀಸ್ ತನಿಖೆಯ ಹಂತ ತಲುಪಿದೆ.
ಗುರುಬಸಪ್ಪ ಅವರಿಗೆ ರವಿ ಬಸಾಪುರ ಎಂಬ ಪುತ್ರ ಹಾಗೂ ರೇಖಾ, ಸುಜಾತಾ, ಗಿರಿಜಾ ಮತ್ತು ಪಾರ್ವತಿ ಎಂಬ ನಾಲ್ವರು ಪುತ್ರಿಯರಿದ್ದಾರೆ. ಕುಟುಂಬದ ಬಳಿ ಸುಮಾರು 27 ಎಕರೆ ಜಮೀನಿದ್ದು, ಇತ್ತೀಚೆಗೆ ಗುರುಬಸಪ್ಪ ಅವರು ತಮ್ಮ ಹೆಣ್ಣುಮಕ್ಕಳಿಗೂ ಆಸ್ತಿಯಲ್ಲಿ ಪಾಲು ನೀಡಿದ್ದರು ಎನ್ನಲಾಗಿದೆ. ಈ ಆಸ್ತಿ ಹಂಚಿಕೆ ವಿಚಾರವಾಗಿ ಕುಟುಂಬದಲ್ಲಿ ಭಿನ್ನಾಭಿಪ್ರಾಯಗಳು ಉಂಟಾಗಿ, ವಿಷಯ ಸಿವಿಲ್ ಕೋರ್ಟ್‌ಗೂ ಹೋಗಿತ್ತು.
ಈ ಮಧ್ಯೆ ಜೂನ್ 15ರಂದು ಗುರುಬಸಪ್ಪ ಅವರು ತಮ್ಮ ತೋಟದಲ್ಲಿ ಅನುಮಾನಾಸ್ಪದ ಸ್ಥಿತಿಯಲ್ಲಿ ಮೃತಪಟ್ಟಿದ್ದರು. ಆರಂಭದಲ್ಲಿ ಕುಟುಂಬದವರು ಅಂತ್ಯಸಂಸ್ಕಾರ ನೆರವೇರಿಸಿದ್ದರು. ಆದರೆ ಕೆಲವೇ ದಿನಗಳಲ್ಲಿ ಪ್ರಕರಣ ಹೊಸ ತಿರುವು ಪಡೆದುಕೊಂಡಿತು.
ಗುರುಬಸಪ್ಪ ಅವರ ಪುತ್ರಿಯರು, “ತಂದೆ ನಮಗೂ ಆಸ್ತಿ ಪಾಲು ನೀಡಿದ್ದಕ್ಕೆ ಅಸಮಾಧಾನಗೊಂಡಿದ್ದ ಅಣ್ಣ ರವಿಯೇ ತಂದೆಯನ್ನು ಕೊಲೆ ಮಾಡಿದ್ದಾರೆ” ಎಂದು ಪೊಲೀಸರಿಗೆ ದೂರು ನೀಡಿದ್ದಾರೆ. ಇದಕ್ಕೆ ಪ್ರತಿಯಾಗಿ ರವಿ ಬಸಾಪುರ, “ನಾನು ಯಾವುದೇ ಕೊಲೆ ಮಾಡಿಲ್ಲ. ತಂಗಿಯರೇ ಆಸ್ತಿ ದುರಾಸೆಯಿಂದ ತಂದೆಯನ್ನು ಕೊಂದು, ಪ್ರಕರಣವನ್ನು ನನ್ನ ಮೇಲೆ ಹೊರಿಸಲು ಯತ್ನಿಸುತ್ತಿದ್ದಾರೆ” ಎಂದು ಪ್ರತಿದೂರು ದಾಖಲಿಸಿದ್ದಾರೆ.
ಕುಟುಂಬ ಸದಸ್ಯರ ಪರಸ್ಪರ ಆರೋಪಗಳಿಂದ ಪ್ರಕರಣ ಗಂಭೀರ ಸ್ವರೂಪ ಪಡೆದಿದ್ದು, ಪೊಲೀಸರು ತನಿಖೆಯನ್ನು ತೀವ್ರಗೊಳಿಸಿದ್ದಾರೆ. ತಹಶೀಲ್ದಾರ್ ರವಿಕುಮಾರ್ ಕೊರವರ ಅವರ ಸಮ್ಮುಖದಲ್ಲಿ, ವಾರದ ಹಿಂದೆ ಸಮಾಧಿ ಮಾಡಲಾಗಿದ್ದ ಗುರುಬಸಪ್ಪ ಅವರ ಶವವನ್ನು ಹೊರತೆಗೆದು ಮರಣೋತ್ತರ ಪರೀಕ್ಷೆ ನಡೆಸಲಾಗಿದೆ. ವೈದ್ಯಕೀಯ ವರದಿಗಾಗಿ ಅಧಿಕಾರಿಗಳು ಕಾಯುತ್ತಿದ್ದಾರೆ.
ಗುರುಬಸಪ್ಪ ಅವರ ಸಾವು ಸಹಜವಾಗಿತ್ತೇ, ಆತ್ಮಹತ್ಯೆಯೇ ಅಥವಾ ಕೊಲೆಯೇ ಎಂಬ ಪ್ರಶ್ನೆಗೆ ಇದೀಗ ಪೋಸ್ಟ್‌ಮಾರ್ಟಂ ವರದಿಯೇ ಸ್ಪಷ್ಟ ಉತ್ತರ ನೀಡಬೇಕಾಗಿದೆ.
ಈ ಘಟನೆ ಕುಟುಂಬ ಬಾಂಧವ್ಯ ಮತ್ತು ಆಸ್ತಿ ವಿಚಾರಗಳು ಹೇಗೆ ಕಾನೂನು ಹೋರಾಟ ಹಾಗೂ ಅನುಮಾನಗಳ ಮಟ್ಟಕ್ಕೆ ತಲುಪುತ್ತವೆ ಎಂಬುದರ ಕುರಿತಾಗಿ ಸಮಾಜದಲ್ಲಿ ಚರ್ಚೆಗೆ ಕಾರಣವಾಗಿದೆ.