ಬೆತ್ತಲಾಗಿ ನಟಿಸಲ್ಲ, ಅನುರಾಗ್ ಕಶ್ಯಪ್ ಚಿತ್ರದ ಆಫರ್ ತಿರಸ್ಕರಿಸಿದ್ದೇಕೆ? ದಶಕಗಳ ಬಳಿಕ ಮೌನ ಮುರಿದ ನಟಿ ತೇಜಸ್ವಿನಿ ಕೊಲ್ಹಾಪುರೆ

ಬಾಲಿವುಡ್ ನಿರ್ದೇಶಕ ಅನುರಾಗ್ ಕಶ್ಯಪ್ ಅವರ ಬಹುಚರ್ಚಿತ ‘ಗುಲಾಲ್’ ಸಿನಿಮಾದಲ್ಲಿ ನಟಿಸುವ ಅವಕಾಶವನ್ನು ತಾವು ಏಕೆ ಕೈಬಿಟ್ಟೆ ಎಂಬುದನ್ನು ನಟಿ ತೇಜಸ್ವಿನಿ ಕೊಲ್ಹಾಪುರೆ ಹಲವು ವರ್ಷಗಳ ಬಳಿಕ ಬಹಿರಂಗಪಡಿಸಿದ್ದಾರೆ. ಸಿದ್ಧಾರ್ಥ್ ಕಣ್ಣನ್‌ಗೆ ನೀಡಿದ ಸಂದರ್ಶನದಲ್ಲಿ ಅವರು ಈ ವಿಷಯವನ್ನು ಹಂಚಿಕೊಂಡಿದ್ದಾರೆ.

ತೇಜಸ್ವಿನಿ ಅವರ ಹೇಳಿಕೆಯಂತೆ, ಅನುರಾಗ್ ಕಶ್ಯಪ್ ಅವರಿಗೆ ಚಿತ್ರದ ಕಥೆ ಓದಲು ನೀಡಿದ್ದರು. ಕಥೆಯನ್ನು ಓದಿದ ಬಳಿಕ ತಾವು ಅಭಿನಯಿಸಬೇಕಿದ್ದ ಮಹಿಳಾ ಪಾತ್ರಕ್ಕೆ ನಿರೀಕ್ಷಿತ ಮಟ್ಟದ ಪ್ರಾಮುಖ್ಯತೆ ಇಲ್ಲವೆಂದು ಅನಿಸಿತು. ಜೊತೆಗೆ ಆ ಪಾತ್ರದಲ್ಲಿ ಬೆತ್ತಲೆ ದೃಶ್ಯಗಳಲ್ಲಿ ಅಭಿನಯಿಸುವ ಅಗತ್ಯವಿದೆ ಎಂದು ತಿಳಿಸಲಾಯಿತು. ಇದಕ್ಕೆ ತಾವು ಒಪ್ಪದ ಕಾರಣ ಚಿತ್ರದಿಂದ ಹೊರಬಂದೆ ಎಂದು ಅವರು ಹೇಳಿದ್ದಾರೆ.

“ಆ ರೀತಿಯ ದೃಶ್ಯದಲ್ಲಿ ನಟಿಸುವುದು ನನಗೆ ಸಾಧ್ಯವಿಲ್ಲ. ನಾನು ಹೀಗೆ ಮಾಡಿದರೆ ಮನೆಯವರೇ ನನ್ನನ್ನು ಒಪ್ಪುವುದಿಲ್ಲ ಎಂದು ಅನುರಾಗ್ ಅವರಿಗೆ ನೇರವಾಗಿ ಹೇಳಿದ್ದೆ. ಆದರೆ ಕಥೆಯ ಅವಶ್ಯಕತೆಯೇ ಅದು ಎಂದು ಅವರು ತಿಳಿಸಿದ್ದರು” ಎಂದು ತೇಜಸ್ವಿನಿ ನೆನಪಿಸಿಕೊಂಡಿದ್ದಾರೆ.

ನಂತರ ಆ ಪಾತ್ರದಲ್ಲಿ ಮಾಡೆಲ್ ಹಾಗೂ ನಟಿ ಜೆಸ್ಸಿ ರಾಂಧವಾ ಅಭಿನಯಿಸಿದರು. ಬಳಿಕ ಜೆಸ್ಸಿ ಆ ದೃಶ್ಯಗಳಲ್ಲಿ ನೇರವಾಗಿ ಅಲ್ಲ, ಬಾಡಿಸೂಟ್ ಧರಿಸಿ ನಟಿಸಿದ್ದರು ಎಂಬುದು ತಿಳಿಯಿತು. ಅದನ್ನು ನೋಡಿದ ನಂತರ, ತಾನೂ ಕೂಡ ಅದೇ ರೀತಿಯಲ್ಲಿ ಆ ಪಾತ್ರವನ್ನು ಮಾಡಬಹುದಿತ್ತು ಎಂಬ ಭಾವನೆ ಮೂಡಿತ್ತು ಎಂದು ತೇಜಸ್ವಿನಿ ಹೇಳಿದ್ದಾರೆ.

ವಿಶೇಷವೆಂದರೆ, ತೇಜಸ್ವಿನಿ ಅವರು ಅನುರಾಗ್ ಕಶ್ಯಪ್ ನಿರ್ದೇಶನದ ‘ಪಾಂಚ್’ ಚಿತ್ರದ ಮೂಲಕ ಬಾಲಿವುಡ್‌ಗೆ ಪಾದಾರ್ಪಣೆ ಮಾಡಬೇಕಿತ್ತು. ಆದರೆ ಆ ಸಿನಿಮಾ ಬಿಡುಗಡೆಯಾಗದೇ ಉಳಿಯಿತು. ನಂತರ ಹಲವು ವರ್ಷಗಳ ಬಳಿಕ 2013ರಲ್ಲಿ ಬಿಡುಗಡೆಯಾದ ‘ಅಗ್ಲಿ’ ಚಿತ್ರದ ಮೂಲಕ ಅನುರಾಗ್ ಕಶ್ಯಪ್ ಹಾಗೂ ತೇಜಸ್ವಿನಿ ಮತ್ತೆ ಒಟ್ಟಾಗಿ ಕೆಲಸ ಮಾಡಿದರು. ಈ ಚಿತ್ರದಲ್ಲಿನ ಅಭಿನಯಕ್ಕಾಗಿ ತೇಜಸ್ವಿನಿ ಅವರಿಗೆ ಅತ್ಯುತ್ತಮ ಪೋಷಕ ನಟಿ ವಿಭಾಗದಲ್ಲಿ ಪ್ರಶಸ್ತಿ ನಾಮನಿರ್ದೇಶನವೂ ದೊರೆತಿತ್ತು.

ತೇಜಸ್ವಿನಿ ಕೊಲ್ಹಾಪುರೆ ತಮ್ಮ ನಟನಾ ಪಯಣವನ್ನು ‘ಮುಜೆ ಚಾಂದ್ ಚಾಹಿಯೇ’ ಧಾರಾವಾಹಿಯ ಮೂಲಕ ಆರಂಭಿಸಿದ್ದರು. ಬಳಿಕ ‘ರಾವಣನ್’, ‘ದಾಡಿ ಕಿ ಶಾದಿ’ ಸೇರಿದಂತೆ ಹಲವು ಚಿತ್ರಗಳಲ್ಲಿ ಅಭಿನಯಿಸಿ ಬಾಲಿವುಡ್‌ನಲ್ಲಿ ತಮ್ಮದೇ ಆದ ಸ್ಥಾನವನ್ನು ನಿರ್ಮಿಸಿಕೊಂಡಿದ್ದಾರೆ.