ನಕಲಿ ಮಾಲೀಕರನ್ನು ನಿಲ್ಲಿಸಿ ₹1.08 ಕೋಟಿ ಮೌಲ್ಯದ ಜಮೀನು ಮಾರಾಟ: ನಾಲ್ವರ ವಿರುದ್ಧ FIR

ಬಳ್ಳಾರಿ: ನಕಲಿ ದಾಖಲೆಗಳನ್ನು ಸೃಷ್ಟಿಸಿ, ನಿಜವಾದ ಜಮೀನು ಮಾಲೀಕರ ಹೆಸರನ್ನು ದುರುಪಯೋಗಪಡಿಸಿಕೊಂಡು ಸುಮಾರು ₹1.08 ಕೋಟಿ ಮೌಲ್ಯದ ಜಮೀನನ್ನು ವಂಚನೆಯಿಂದ ಮಾರಾಟ ಮಾಡಲಾಗಿದೆ ಎಂಬ ಆರೋಪ ಕೇಳಿಬಂದಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ನಾಲ್ವರು ಆರೋಪಿಗಳ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವಂತೆ ಬಳ್ಳಾರಿ ನೋಂದಣಿ ಮತ್ತು ಮುದ್ರಾಂಕ ಇಲಾಖೆ ಅಧಿಕಾರಿಗಳು ಪೊಲೀಸರಿಗೆ ದೂರು ನೀಡಿದ್ದಾರೆ.

ಸೆಪ್ಟೆಂಬರ್ 28, 2026ರಂದು ರಾತ್ರಿ 9.15ರ ಸುಮಾರಿಗೆ ಸಬ್‌ ರಿಜಿಸ್ಟರ್ ಕಚೇರಿಯ ದೇವಪ್ಪ ಅವರು ಠಾಣೆಗೆ ನೀಡಿದ ದೂರಿನ ಪ್ರಕಾರ, ಬಳ್ಳಾರಿ ತಾಲ್ಲೂಕಿನ ಕೊಳಗಲ್ ಗ್ರಾಮದ ಸರ್ವೇ ನಂಬರ್ 619ಎ/2ರಲ್ಲಿರುವ 6 ಎಕರೆ 87 ಸೆಂಟ್ಸ್ ಜಮೀನು ಬೆಂಗಳೂರಿನಲ್ಲಿ ವಾಸವಾಗಿರುವ ಶ್ರೀಮತಿ ಸ್ವಪ್ನ ಪಿ. ಅವರಿಗೆ ಸೇರಿದೆ ಎನ್ನಲಾಗಿದೆ.

ದೂರಿನ ಪ್ರಕಾರ, ಆರೋಪಿ ಲೋಕೇಶ್ ಎಂಬಾತ ಜಮೀನನ್ನು ವಂಚನೆಯ ಮೂಲಕ ಪಡೆದುಕೊಳ್ಳುವ ಉದ್ದೇಶದಿಂದ ನಿಜವಾದ ಮಾಲೀಕರಾದ ಸ್ವಪ್ನ ಪಿ. ಅವರ ಹೆಸರನ್ನು ದುರುಪಯೋಗಪಡಿಸಿಕೊಂಡು ನಕಲಿ ದಾಖಲೆಗಳನ್ನು ಸೃಷ್ಟಿಸಿದ್ದಾನೆ. ಬಳಿಕ ನಕಲಿ ದಾಖಲೆಗಳನ್ನು ಮೂಲ ದಾಖಲೆಗಳೆಂದು ಬಿಂಬಿಸಿ, ಅದೇ ಹೆಸರಿನ ಮತ್ತೊಬ್ಬ ಮಹಿಳೆಯನ್ನು ನೋಂದಣಿ ಕಚೇರಿಗೆ ಕರೆತಂದು ನಿಜವಾದ ಮಾಲೀಕರಂತೆ ಪರಿಚಯಿಸಲಾಗಿದೆ ಎಂದು ಆರೋಪಿಸಲಾಗಿದೆ.

ನಕಲಿ ಮಹಿಳೆಯು ನಿಜವಾದ ಮಾಲೀಕರಂತೆ ನಟಿಸಿ, ಅವರ ಹೆಸರಿನಲ್ಲಿ ನಕಲಿ ಸಹಿ ಮಾಡಿಸಿ, 2026ರ ಜೂನ್ 9ರಂದು ₹1,08,50,000ಕ್ಕೆ ಜಮೀನಿನ ಮಾರಾಟದ ಕರಾರು (Sale Deed) ನೋಂದಣಿ ಮಾಡಿಸಲಾಗಿದೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.

ಇನ್ನು ಪ್ರಕರಣದಲ್ಲಿ ಗುಂಡೆ ಹುಸೇನ್ ಪೀರ್ ಹಾಗೂ ವಿ. ಹನುಮಂತಪ್ಪ ಅವರು ನಿಜವಾದ ಜಮೀನು ಮಾಲೀಕರನ್ನು ತಿಳಿದಿದ್ದರೂ, ನೋಂದಣಿ ಕಚೇರಿಗೆ ಹಾಜರಾದ ನಕಲಿ ಮಹಿಳೆಯನ್ನೇ ಮೂಲ ಮಾಲೀಕರೆಂದು ಗುರುತಿಸಿ, ವಿಕ್ರಯ ದಸ್ತಾವೇಜಿಗೆ ಸಾಕ್ಷಿದಾರರಾಗಿ ಸಹಿ ಮಾಡಿದ್ದಾರೆ ಎಂದು ಆರೋಪಿಸಲಾಗಿದೆ.

ಈ ಮೂಲಕ ನಿಜವಾದ ಮಾಲೀಕರ ಹೆಸರನ್ನು ದುರುಪಯೋಗಪಡಿಸಿಕೊಂಡು ನಕಲಿ ದಾಖಲೆಗಳನ್ನು ಸೃಷ್ಟಿಸುವುದು, ನಕಲಿ ಸಹಿ ಮಾಡುವುದು, ನಕಲಿ ವ್ಯಕ್ತಿಯನ್ನು ಮೂಲ ಮಾಲೀಕರಂತೆ ಬಿಂಬಿಸಿ ಜಮೀನು ಮಾರಾಟ ಮಾಡುವುದು ಸೇರಿದಂತೆ ವಂಚನೆ ನಡೆಸಲಾಗಿದೆ ಎಂದು ದೂರಿನಲ್ಲಿ ಆರೋಪಿಸಲಾಗಿದೆ.

ಪ್ರಕರಣಕ್ಕೆ ಸಂಬಂಧಿಸಿದಂತೆ ಶ್ರೀಮತಿ ಸ್ವಪ್ನ ಪಿ., ಲೋಕೇಶ್, ಗುಂಡೆ ಹುಸೇನ್ ಪೀರ್ ಹಾಗೂ ವಿ. ಹನುಮಂತಪ್ಪ ವಿರುದ್ಧ ಕಾನೂನು ರೀತ್ಯ ಕ್ರಮ ಕೈಗೊಳ್ಳುವಂತೆ ದೂರು ನೀಡಲಾಗಿದೆ. ಪ್ರಕರಣದ ಕುರಿತು ಪೊಲೀಸರು ತನಿಖೆ ನಡೆಸಬೇಕಿದ್ದು, ಆರೋಪಗಳ ಸತ್ಯಾಸತ್ಯತೆ ತನಿಖೆಯ ನಂತರವೇ ಸ್ಪಷ್ಟವಾಗಬೇಕಿದೆ.