ಪ್ರೇಮಿಯೊಂದಿಗೆ ಸೇರಿ ಪತಿಯ ಹತ್ಯೆ! ಅಂತ್ಯಸಂಸ್ಕಾರದವರೆಗೂ ನಾಟಕ, 49 ಕರೆಗಳು ಬಯಲು ಮಾಡಿದ ಭೀಕರ ಸಂಚು

ಹರಿಯಾಣದ ರೇವಾರಿ ಜಿಲ್ಲೆಯಲ್ಲಿ ಪತ್ನಿಯೊಬ್ಬಳು ತನ್ನ ಪ್ರೇಮಿಯೊಂದಿಗೆ ಸೇರಿ ಪತಿಯನ್ನು ಹತ್ಯೆ ಮಾಡಿದ ಆರೋಪದ ಪ್ರಕರಣ ಬೆಳಕಿಗೆ ಬಂದಿದೆ. ಪುಣೆಯಲ್ಲಿ ನಡೆದ ಇದೇ ರೀತಿಯ ಘಟನೆಯ ಬೆನ್ನಲ್ಲೇ ಈ ಪ್ರಕರಣ ಬಹಿರಂಗವಾಗಿದ್ದು, ದಾಂಪತ್ಯ ಸಂಬಂಧಗಳಲ್ಲಿನ ನಂಬಿಕೆ ಕುರಿತು ಮತ್ತೊಮ್ಮೆ ಪ್ರಶ್ನೆಗಳನ್ನು ಎಬ್ಬಿಸಿದೆ.

ಮೃತ ಯುವಕನನ್ನು 21 ವರ್ಷದ ಮೋನು ಎಂದು ಗುರುತಿಸಲಾಗಿದ್ದು, ಆತನ ಪತ್ನಿ ತನು ತನ್ನ ಪ್ರೇಮಿಯೊಂದಿಗೆ ಸೇರಿ ಈ ಕೃತ್ಯ ಎಸಗಿರುವ ಆರೋಪ ಎದುರಿಸುತ್ತಿದ್ದಾಳೆ. ಪತಿಯ ಸಾವಿನ ಬಳಿಕ ಅಂತಿಮ ಸಂಸ್ಕಾರದವರೆಗೂ ದುಃಖಿತಳಂತೆ ವರ್ತಿಸಿದ್ದ ತನು, ಪೊಲೀಸ್ ತನಿಖೆ ವೇಳೆ ಸಿಕ್ಕಿಬಿದ್ದಿದ್ದಾಳೆ ಎಂದು ತಿಳಿದುಬಂದಿದೆ.

ಪ್ರಕರಣದ ತನಿಖೆ ವೇಳೆ ಮೊಬೈಲ್ ಕರೆಗಳ ವಿವರಗಳು ಪೊಲೀಸರಿಗೆ ಮಹತ್ವದ ಸುಳಿವು ನೀಡಿವೆ. ಹತ್ಯೆ ನಡೆದ ದಿನವೇ ತನು ತನ್ನ ಪ್ರೇಮಿಗೆ ಬರೋಬ್ಬರಿ 49 ಬಾರಿ ಕರೆ ಮಾಡಿರುವುದು ಪತ್ತೆಯಾಗಿದ್ದು, ಬಳಿಕ ಕಾಲ್ ರೆಕಾರ್ಡ್‌ಗಳು ಹಾಗೂ ಇತರ ಸಾಕ್ಷ್ಯಾಧಾರಗಳ ಆಧಾರದ ಮೇಲೆ ಹತ್ಯೆಯ ಸಂಚು ಬೆಳಕಿಗೆ ಬಂದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಪ್ರಕರಣ ಸಂಬಂಧ ತನಿಖೆ ಮುಂದುವರಿದಿದ್ದು, ಆರೋಪಿಗಳ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲಾಗಿದೆ.