ಯುವತಿಯ ಅನುಮಾನಾಸ್ಪದ ಮರಣ: ಪತಿಯ ವಿರುದ್ಧ ಪೋಷಕರಿಂದ ಕೊಲೆ ಆರೋಪ

ನಂಜನಗೂಡು: ನಂಜನಗೂಡು ತಾಲ್ಲೂಕಿನ ಕರಳಪುರ ಗ್ರಾಮದಲ್ಲಿ ಯುವತಿ ಯೊಬ್ಬಳು ನೇಣು ಬಿಗಿದ ಸ್ಥಿತಿಯಲ್ಲಿ ಶವವಾಗಿ ಪತ್ತೆಯಾಗಿರುವ ಘಟನೆ ಉದ್ವಿಗ್ನತೆ ಸೃಷ್ಟಿಸಿದೆ. 25 ವರ್ಷದ ಮಹದೇವಿ ಎಂಬವರು ಮೃತಪಟ್ಟ ಯುವತಿ.

ಮಹದೇವಿ ಮಡುವಿನಹಳ್ಳಿ ಗ್ರಾಮದ ಮಹದೇವಶೆಟ್ಟಿ ಅವರ ಪುತ್ರಿಯಾಗಿದ್ದು, ಮೂರು ವರ್ಷಗಳ ಹಿಂದೆ ಕರಳಪುರ ಗ್ರಾಮದ ಕಾಂತ ಎಂಬುವವರೊಂದಿಗೆ ವಿವಾಹವಾಗಿದ್ದಳು. ಪ್ರೇಮ ವಿವಾಹವಾಗಿದ್ದ ಈ ದಂಪತಿಯ ಜೀವನದಲ್ಲಿ ಏನಾದರೂ ದುರಂತ ಸಂಭವಿಸಿದ ಶಂಕೆ ಹುಟ್ಟಿಸಿದೆ.

ಮಹದೇವಿಯ ಶವವು ನೇಣು ಬಿಗಿದ ಸ್ಥಿತಿಯಲ್ಲಿ ಮನೆಯಲ್ಲೇ ಪತ್ತೆಯಾಗಿದ್ದು, ಘಟನೆಗೆ ಸಂಬಂಧಿಸಿ ಹಲವು ಅನುಮಾನಗಳು ಮುತ್ತಳಿಕೆ ಮಾಡುತ್ತಿವೆ. ಈ ಮಧ್ಯೆ, ಮೃತ ಮಹಿಳೆಯ ಪೋಷಕರು ಅವರ ಮಗಳ ಮರಣವು ಆತ್ಮಹತ್ಯೆ ಅಲ್ಲ,  ಉದ್ದೇಶಪೂರ್ವಕ ಕೊಲೆ ಎಂಬ ಗಂಭೀರ ಆರೋಪ ಹೊರಿಸಿದ್ದಾರೆ.

“ಮಗಳ ಸಾವಿಗೆ ಆಕೆಯ ಗಂಡ ಕಾಂತನೇ ಕಾರಣ,” ಎಂಬುದಾಗಿ ಮಹದೇವಿಯ ಪೋಷಕರು ಮಾಧ್ಯಮಗಳಿಗೆ ದೂರಿದ್ದರು. ಅವರು ಪ್ರಕರಣದ ನಿಖರ ತನಿಖೆ ನಡೆಯಬೇಕೆಂದು ಒತ್ತಾಯಿಸಿದ್ದಾರೆ.

ಘಟನಾ ಸ್ಥಳಕ್ಕೆ ನಂಜನಗೂಡು ಗ್ರಾಮಾಂತರ ಠಾಣೆಯ ಪಿಎಸ್‌ಐ ಸುನೀಲ್ ಕುಮಾರ್ ಮತ್ತು ಎಎಸ್‌ಐ ನಾಗರಾಜು ದೌಡಾಯಿಸಿ ಪರಿಶೀಲನೆ ನಡೆಸಿದ್ದಾರೆ. ಬಳಿಕ ಶವವನ್ನು ಮರಣೋತ್ತರ ಪರೀಕ್ಷೆಗಾಗಿ ಆಸ್ಪತ್ರೆಗೆ ರವಾನಿಸಲಾಗಿದೆ.

ಈ ಸಂಬಂಧ ನಂಜನಗೂಡು ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿ ಮುಂದಿನ ತನಿಖೆ ಮುಂದುವರಿದಿದೆ.