‘Eleven’ ಬರೆದು ತೋರಿಸು ಎಂದರೆ ‘Even’ ಬರೆದ ಸರ್ಕಾರಿ ಶಾಲಾ ಶಿಕ್ಷಕ.!

ಛತ್ತೀಸ್‌ಗಢದ ಬಲರಾಂಪುರ ಜಿಲ್ಲೆಯ ಸರ್ಕಾರಿ ಶಾಲೆಯೊಂದರಲ್ಲಿ ನಡೆದ ಒಂದು ಘಟನೆ ಭಾರೀ ಚರ್ಚೆಗೆ ಕಾರಣವಾಗಿದೆ.‌ ಕೆಲವರು ಸರ್ಕಾರಿ ಕೆಲಸ ಪಡೆಯಲು ವರ್ಷವಾರು ಹೋರಾಟ ನಡೆಸುತ್ತಾ ಓದುತ್ತಾರೆ. ಸರ್ಕಾರದ ನೌಕರಿ ಸಿಕ್ಕರೆ ಬದುಕು ಸ್ಥಿರವಾಗುತ್ತದೆ ಎಂಬ ಭ್ರಮೆಯಲ್ಲಿರುವವರು ಅನೇಕರಿದ್ದಾರೆ. ಆದರೆ, ಕೆಲ ಸರ್ಕಾರಿ ನೌಕರರ ದುಡಿಯುವ ಮಾನದಂಡ ಮತ್ತು ಅವರ ಅರ್ಹತೆ ನಡುವೆ ಭಾರಿ ಅಂತರವಿರುವುದನ್ನು ಈ ಘಟನೆಯು ಮತ್ತೆ ನೆನಪಿಸುತ್ತದೆ.

ಬಲರಾಂಪುರ ಜಿಲ್ಲೆಯ ಸರ್ಕಾರಿ ಶಾಲೆಗೆ ದೈಹಿಕವಾಗಿ ಪರಿಶೀಲನೆ ನಡೆಸಲು ಸ್ಥಳೀಯ ಶಿಕ್ಷಣಾಧಿಕಾರಿಗಳು ಭೇಟಿ ನೀಡಿದಾಗ, ಅಲ್ಲೊಬ್ಬ ಶಿಕ್ಷಕರಿಗೆ ಬ್ಲ್ಯಾಕ್‌ಬೋರ್ಡ್ ಮೇಲೆ “eleven” ಎಂಬ ಪದದ ಸ್ಪೆಲ್ಲಿಂಗ್ ಬರೆಯಲು ಕೇಳಿದರು. ಅಚ್ಚರಿ ಎಂದರೆ, ಆ ಶಿಕ್ಷಕರು “eleven” ಬದಲು “even” ಎಂದು ಬರೆಯುವ ಮೂಲಕ ತಮ್ಮ ಅಕ್ಷರಜ್ಞಾನವಿಲ್ಲದ ನೈಜತೆ ಬಹಿರಂಗ ಪಡಿಸಿದರು!

ಇದೀಗ ದೇಶದಾದ್ಯಂತ ಈ ವಿಷಯ ಚರ್ಚೆಗೆ ಗ್ರಾಸವಾಗಿದೆ. ವಿಡಿಯೋದಲ್ಲಿನ ದೃಶ್ಯದಲ್ಲಿ, ಶಿಕ್ಷಕರಿಗೆ ಅವರ ತಪ್ಪನ್ನು ಹೇಳಿದರೂ ಸಹ ಅವರು ತಮ್ಮ ತಪ್ಪನ್ನು ಅರಿಯದೇ ಇರಲು ಇಚ್ಛಿಸುತ್ತಿರುವುದು ಸ್ಪಷ್ಟವಾಗಿ ಕಾಣಿಸುತ್ತಿದೆ.

ಅಲ್ಲಿದ್ದ ಇತರ ಶಿಕ್ಷಕರೂ ಸಹ ತಪ್ಪು ಸ್ಪೆಲ್ಲಿಂಗ್ ಅನ್ನು ಸಮರ್ಥಿಸಿಕೊಂಡಿರುವ ದೃಶ್ಯಗಳು ಆಘಾತಕ್ಕೆ ಕಾರಣವಾಗಿವೆ. ವಿದ್ಯಾರ್ಥಿಗಳಿಗೆ ಪ್ರಾಥಮಿಕ ಮಟ್ಟದ ಪದಗಳ ಜ್ಞಾನ ಕಲಿಸಲು ಬೇಕಾಗುವ ತಕ್ಕಮಟ್ಟದ ಅರ್ಹತೆ ಇಲ್ಲದವರೇ ಶಿಕ್ಷಕರಾಗಿರುವುದಕ್ಕೆ ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ಈ ಶಿಕ್ಷಕ ನಿತ್ಯವೇ 70,000 ರೂ. ಸಂಬಳ ಪಡೆಯುತ್ತಿದ್ದಾರೆ ಎಂಬ ಮಾಹಿತಿ ವೈರಲ್ ಆದ ನಂತರ, ಸಾರ್ವಜನಿಕರು ಪ್ರಶ್ನೆ ಎತ್ತಿದ್ದಾರೆ – “ಅಂತಹವರು ಮಕ್ಕಳ ಭವಿಷ್ಯ ನಿರ್ಮಾಣ ಮಾಡಬೇಕೆ?”

ಸರ್ಕಾರಿ ಶಾಲೆಗಳ ಗುಣಮಟ್ಟ, ಶಿಕ್ಷಕರ ಅರ್ಹತೆ ಮತ್ತು ನೇಮಕಾತಿ ವಿಧಾನಗಳ ಕುರಿತಾದ ಭಾರೀ ಚರ್ಚೆ ಈ ವಿಡಿಯೋ ಹಿನ್ನೆಲೆಯಲ್ಲಿ ಮತ್ತೆ ಪ್ರಾರಂಭವಾಗಿದೆ. ಶಿಕ್ಷಣ ಇಲಾಖೆ ಈ ಬಗ್ಗೆ ಯಾವುದೇ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲವಾದರೂ, ಸಾರ್ವಜನಿಕ ಒತ್ತಡದ ಮಧ್ಯೆ ಕ್ರಮ ಕೈಗೊಳ್ಳಬೇಕಾಗುವ ಸಾಧ್ಯತೆ ಹೆಚ್ಚಾಗಿದೆ.