ಮುಂಬೈ, ಜುಲೈ 22: ಮಹಾರಾಷ್ಟ್ರದ ಥಾಣೆಯ ಖಾಸಗಿ ಆಸ್ಪತ್ರೆಯೊಂದರಲ್ಲಿ 26 ವರ್ಷದ ರಿಸೆಪ್ಷನಿಸ್ಟ್ ಸೋನಾಲಿ ಎಂಬವರು ರೋಗಿಯ ಹಲ್ಲೆಗೆ ಒಳಗಾದ ಘಟನೆ ನಡೆದಿದೆ. ವೈದ್ಯರ ಅಪಾಯಿಂಟ್ಮೆಂಟ್ ಇಲ್ಲದೆ ಒಳಗೆ ಪ್ರವೇಶಿಸಲು ನಿರಾಕರಿಸಿದುದಕ್ಕೆ ರೋಗಿಯೊಬ್ಬ ಅಸಹ್ಯವಾಗಿ ವರ್ತಿಸಿದ್ದು, ಈ ದೃಶ್ಯಗಳು ಆಸ್ಪತ್ರೆಯ ಸಿಸಿಟಿವಿ ಕ್ಯಾಮೆರಾದಲ್ಲಿ ದಾಖಲಾಗಿವೆ.
ಘಟನೆಯ ವಿವರಗಳ ಪ್ರಕಾರ, ಆಸ್ಪತ್ರೆಯ ವೈದ್ಯರು ಆ ಸಮಯದಲ್ಲಿ ಮೀಟಿಂಗ್ನಲ್ಲಿದ್ದರು. ಇದರಿಂದಾಗಿ, ಯಾರನ್ನೂ ಒಳಗೆ ಬಿಡಬಾರದೆಂದು ವೈದ್ಯರು ನಿರ್ದಿಷ್ಟವಾಗಿ ಸೂಚನೆ ನೀಡಿದ್ದರು. ಈ ಹಿನ್ನೆಲೆಯಲ್ಲಿ ಸೋನಾಲಿ ಅವರು ಒಂದು ವೇಳೆ ಕಾಯಬೇಕೆಂದು ರೋಗಿಗೆ ತಿಳಿಸಿದರು.
ಆದರೆ ಕುಡಿತದ ಅಮಲಿನಲ್ಲಿದ್ದ ಆರೋಪಿತ ಗೋಕುಲ್ ಝಾ ಎಂಬ ವ್ಯಕ್ತಿ ಬಲವಂತವಾಗಿ ವೈದ್ಯರ ಕ್ಯಾಬಿನ್ ಒಳಗೆ ಹೋಗಲು ಪ್ರಯತ್ನಿಸಿದ. ಸೋನಾಲಿ ತಡೆದಾಗ ಆಕೆಯನ್ನು ತಳ್ಳಿಹಾಕಿ ಎಳೆದಾಡಿದ. ಘಟನೆಯು ಕೆಲ ಕ್ಷಣ ಗಲಾಟೆಗೆ ಕಾರಣವಾಯಿತಾದರೂ, ಸ್ಥಳದಲ್ಲಿದ್ದ ಕ್ಲಿನಿಕ್ ಸಿಬ್ಬಂದಿ ಹಾಗೂ ಇತರ ರೋಗಿಗಳ ಸಂಬಂಧಿಕರು ಮಧ್ಯಪ್ರವೇಶಿಸಿ ಸೋನಾಲಿಯ ರಕ್ಷಣೆ ಮಾಡಿದರು.
ಈ ಘಟನೆಯ ದೃಶ್ಯಗಳು ಆಸ್ಪತ್ರೆಯ ಸಿಸಿಟಿವಿ ಕ್ಯಾಮೆರಾದಲ್ಲಿ ಸ್ಪಷ್ಟವಾಗಿ ದಾಖಲಾಗಿವೆ. ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಮುಂದುವರಿಸಿದ್ದಾರೆ. ಆಸ್ಪತ್ರೆಯ ಸಿಬ್ಬಂದಿ ಈ ಪ್ರಕರಣವನ್ನು ಗಂಭೀರವಾಗಿ ತೆಗೆದುಕೊಂಡಿದ್ದು, ಮಹಿಳಾ ಸಿಬ್ಬಂದಿಯ ಸುರಕ್ಷತೆ ಕುರಿತು ಮರುಪರಿಶೀಲನೆ ನಡೆಸಲಾಗುತ್ತಿದೆ.
