ಸತತ 3 ಬಾರಿ UPSC ಫೇಲ್.. ಒಂದೇ ಅಭ್ಯಾಸ ಬದಲಿಸಿ 24ನೇ ವಯಸ್ಸಿಗೆ IAS ಆದ ನೇಹಾ ಬ್ಯಾಡ್ವಲ್!

UPSC ಪರೀಕ್ಷೆಯಲ್ಲಿ ಯಶಸ್ಸು ಸಾಧಿಸುವ ಕನಸು ಲಕ್ಷಾಂತರ ಯುವಕರದ್ದಾಗಿದ್ದರೂ, ಅದನ್ನು ನನಸು ಮಾಡುವುದು ಕೆಲವೇ ಮಂದಿಗೆ ಸಾಧ್ಯವಾಗುತ್ತದೆ. ಹಲವು ಮಂದಿ ಒಂದೆರಡು ಬಾರಿ ವಿಫಲವಾದ ಬಳಿಕ ಕೈಚೆಲ್ಲುತ್ತಾರೆ. ಆದರೆ ರಾಜಸ್ಥಾನದ ನೇಹಾ ಬ್ಯಾಡ್ವಲ್ ಮಾತ್ರ ಸತತ ಮೂರು ಬಾರಿ ಸೋತರೂ ಹಿಂಜರಿಯದೆ, ತಮ್ಮ ಓದು ವಿಧಾನದಲ್ಲಿ ಒಂದೇ ಒಂದು ಮಹತ್ವದ ಬದಲಾವಣೆ ಮಾಡಿಕೊಂಡು ಕೇವಲ 24ನೇ ವಯಸ್ಸಿಗೆ IAS ಅಧಿಕಾರಿಯಾಗಿ ಹೊರಹೊಮ್ಮಿದ್ದಾರೆ.

ಮೊದಲ ಮೂರು ಪ್ರಯತ್ನಗಳಲ್ಲಿ ನಿರಾಸೆ

ನೇಹಾ ಚಿಕ್ಕ ವಯಸ್ಸಿನಿಂದಲೇ UPSC ತಯಾರಿ ಆರಂಭಿಸಿದ್ದರು. ಸಾಕಷ್ಟು ಓದುತ್ತಿದ್ದರೂ ಮೊದಲ ಮೂರು ಪ್ರಯತ್ನಗಳಲ್ಲಿ ಪ್ರಿಲಿಮ್ಸ್ ಹಂತವನ್ನೇ ದಾಟಲು ಸಾಧ್ಯವಾಗಿರಲಿಲ್ಲ. ಇದರಿಂದ ಅವರು ತಮ್ಮ ತಯಾರಿಯಲ್ಲಿ ಎಲ್ಲಿ ತಪ್ಪಾಗುತ್ತಿದೆ ಎಂದು ಆಳವಾಗಿ ವಿಶ್ಲೇಷಣೆ ಮಾಡಲು ಮುಂದಾದರು.

ಯಶಸ್ಸಿಗೆ ಕಾರಣವಾದ ಒಂದೇ ಬದಲಾವಣೆ

ಆಗ ಅವರಿಗೆ ತಿಳಿದದ್ದು — ಕೇವಲ ಪುಸ್ತಕ ಓದಿ ಸಿಲಬಸ್ ಮುಗಿಸುವುದರಿಂದ ಮಾತ್ರ ಯಶಸ್ಸು ಸಿಗುವುದಿಲ್ಲ ಎಂಬುದು. ಪರೀಕ್ಷೆಯ ಮಾದರಿಯನ್ನು ಅರ್ಥಮಾಡಿಕೊಳ್ಳಲು ಮತ್ತು ಸಮಯ ನಿರ್ವಹಣೆ ಕಲಿಯಲು ಪ್ರಾಕ್ಟೀಸ್ ಅತ್ಯಗತ್ಯ ಎಂದು ಅರಿತುಕೊಂಡರು.

ಅದರ ನಂತರ ನೇಹಾ ತಮ್ಮ ಓದು ವಿಧಾನವನ್ನೇ ಬದಲಿಸಿಕೊಂಡರು. ಪ್ರತಿದಿನ ಕನಿಷ್ಠ 2 ರಿಂದ 3 ಮಾಕ್ ಟೆಸ್ಟ್‌ಗಳನ್ನು ಬರೆಯುವುದನ್ನು ಅಭ್ಯಾಸ ಮಾಡಿಕೊಂಡರು. MCQಗಳನ್ನು ಹೆಚ್ಚು ಹೆಚ್ಚು ಸಾಲ್ವ್ ಮಾಡಿ, ಮಾಡಿದ ತಪ್ಪುಗಳನ್ನು ಪ್ರತ್ಯೇಕವಾಗಿ ನೋಟ್ಸ್ ಮಾಡಿಕೊಂಡು ಅವುಗಳನ್ನು ತಿದ್ದಿಕೊಳ್ಳಲು ಹೆಚ್ಚಿನ ಗಮನ ಹರಿಸಿದರು.

ನಾಲ್ಕನೇ ಪ್ರಯತ್ನದಲ್ಲೇ AIR 260

ಈ ಹೊಸ ಸ್ಟ್ರಾಟಜಿ ನೇಹಾ ಅವರ ಆತ್ಮವಿಶ್ವಾಸವನ್ನು ಹೆಚ್ಚಿಸಿತು. ನಿರಂತರ ಮಾಕ್ ಟೆಸ್ಟ್ ಮತ್ತು ತಪ್ಪುಗಳ ವಿಶ್ಲೇಷಣೆಯ ಪರಿಣಾಮವಾಗಿ ನಾಲ್ಕನೇ ಪ್ರಯತ್ನದಲ್ಲಿ ಅವರು UPSC ಪರೀಕ್ಷೆಯಲ್ಲಿ AIR 260 ರ್ಯಾಂಕ್ ಪಡೆದು IAS ಕನಸನ್ನು ನನಸು ಮಾಡಿಕೊಂಡರು.

UPSC ಅಭ್ಯರ್ಥಿಗಳಿಗೆ ನೇಹಾ ಸಲಹೆ

“ಕೇವಲ ಹಾರ್ಡ್ ವರ್ಕ್ ಸಾಕಾಗುವುದಿಲ್ಲ. ನಮ್ಮ ತಪ್ಪುಗಳನ್ನು ಗುರುತಿಸಿ ಸರಿಪಡಿಸುವ ಸ್ಮಾರ್ಟ್ ವರ್ಕ್ ಕೂಡ ಅಷ್ಟೇ ಮುಖ್ಯ. ನಿರಂತರ ಮಾಕ್ ಟೆಸ್ಟ್‌ಗಳು ಯಶಸ್ಸಿನತ್ತ ಕರೆದೊಯ್ಯುತ್ತವೆ,” ಎಂದು ನೇಹಾ ಹೇಳುತ್ತಾರೆ.

ಸತತ ಸೋಲುಗಳ ನಡುವೆಯೂ ಆತ್ಮವಿಶ್ವಾಸ ಕಳೆದುಕೊಳ್ಳದೆ ಹೋರಾಡಿದ ನೇಹಾ ಬ್ಯಾಡ್ವಲ್ ಅವರ ಕಥೆ UPSC ಕನಸು ಕಾಣುವ ಪ್ರತಿಯೊಬ್ಬರಿಗೂ ಸ್ಪೂರ್ತಿದಾಯಕವಾಗಿದೆ.