ನಗ್ನ ವೀಡಿಯೋ ಚಿತ್ರಿಸಿ ಗುಜರಾತ್‌ನಲ್ಲಿ ಕಾಲೇಜು ವಿದ್ಯಾರ್ಥಿನಿಗೆ ಒಂದು ವರ್ಷದಿಂದ ನಿರಂತರ ಅತ್ಯಾಚಾರ: ಏಳು ಮಂದಿ ವಿರುದ್ಧ ಪ್ರಕರಣ ದಾಖಲು

ಗುಜರಾತ್‌ನ ಬನಸ್ಕಾಂಠ ಜಿಲ್ಲೆಯಲ್ಲೊಂದು ಘೋರ ಘಟನೆ ನಡೆದಿದೆ. 2023ರಲ್ಲಿ ಕಾಲೇಜಿಗೆ ಹೋಗುತ್ತಿದ್ದ ವಿದ್ಯಾರ್ಥಿನಿಯೊಬ್ಬಳನ್ನು ಇನ್‌ಸ್ಟಾಗ್ರಾಂ ಮೂಲಕ ಪರಿಚಯ ಮಾಡಿಕೊಂಡ ಆರೋಪಿ, ಸ್ನೇಹ ಗಟ್ಟಿ ಮಾಡಿಕೊಂಡ ನಂತರ, ವಂಚನೆಯ ಮೂಲಕ ಆಕೆಯ ಖಾಸಗಿ ವಿಡಿಯೋ ದಾಖಲಿಸಿದ್ದಾನೆ.

ವಂಚನೆಯ ಮೂಲಕ ವಶಕ್ಕೆ ಪಡೆದು, ಶೋಷಣೆ

2023ರ ನವೆಂಬರ್‌ನಲ್ಲಿ ಆರೋಪಿ ವಿಶಾಲ್ ಚೌಧರಿ ವಿದ್ಯಾರ್ಥಿನಿಯನ್ನು ಉಪಹಾರಕ್ಕೆ ಕರೆಸಿಕೊಂಡು, ಅವಳ ಮೇಲೆ ಉದ್ದೇಶಪೂರ್ವಕವಾಗಿ ಟೀ ಸುರಿದಿದ್ದಾನೆ. ಈ ಸಂದರ್ಭ, ಬಟ್ಟೆ ಶುಚಿಗೊಳಿಸಲು ಸಲಹೆ ನೀಡಿ, ಹೋಟೆಲ್ ರೂಂಗೆ ಕರೆದುಕೊಂಡು ಹೋಗಿದ್ದಾನೆ. ವಿದ್ಯಾರ್ಥಿನಿ ಸ್ನಾನಗೃಹದಲ್ಲಿ ಬಟ್ಟೆ ಬದಲಾಯಿಸುವಾಗ, ಆರೋಪಿ ಆಕೆಯ ನಗ್ನ ವೀಡಿಯೋ ಚಿತ್ರಿಸಿದ್ದಾನೆ.

ಅವಳನ್ನು ಬೆದರಿಸಿ, ಈ ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಹರಡುವುದಾಗಿ ಧಮ್ಕಿ ಹಾಕಿದ್ದಾನೆ. ಇದರಿಂದ ಭಯಗೊಂಡ ವಿದ್ಯಾರ್ಥಿನಿ, ನವೆಂಬರ್ 2023 ರಿಂದ ಫೆಬ್ರವರಿ 2025ರವರೆಗೆ ಆರೋಪಿ ಹಾಗೂ ಅವನ ಸ್ನೇಹಿತರಿಂದ ಪುನರಾವರ್ತಿತ ಶೋಷಣೆಗೆ ಗುರಿಯಾಗಿದ್ದಾಳೆ.

ಪೊಲೀಸರಿಗೆ ದೂರು, ಏಳು ಮಂದಿಯ ವಿರುದ್ಧ ಎಫ್‌ಐಆರ್

ಈ ಘಟನೆ ಸಂಬಂಧ ವಿದ್ಯಾರ್ಥಿನಿ ಪಾಲನ್‌ಪುರ ತಾಲೂಕಿನ ಪೊಲೀಸರನ್ನು ಸಂಪರ್ಕಿಸಿದ ನಂತರ, ಆರೋಪಿ ವಿಶಾಲ್ ಚೌಧರಿ ಸೇರಿದಂತೆ ಆರು ಮಂದಿಯನ್ನು ಗುರುತಿಸಲಾಗಿದ್ದು, ಮತ್ತೊಬ್ಬ ಅಪರಿಚಿತ ವ್ಯಕ್ತಿಯ ವಿರುದ್ಧವೂ ಪ್ರಕರಣ ದಾಖಲಿಸಲಾಗಿದೆ.

ಅವರ ಮೇಲೆ ಪುನರಾವರ್ತಿತ ಅತ್ಯಾಚಾರ, ಕ್ರಿಮಿನಲ್ ಬೆದರಿಕೆ ಸೇರಿದಂತೆ ಭಾರತೀಯ ದಂಡ ಸಂಹಿತೆಯ ಹಲವು ಕಠಿಣ ವಿಧಿಗಳ ಅಡಿಯಲ್ಲಿ ಆರೋಪ ಇರಿಸಲಾಗಿದೆ. ಜೊತೆಗೆ, ಇಲೆಕ್ಟ್ರಾನಿಕ್ ಮಾಧ್ಯಮದಲ್ಲಿ ಅಶ್ಲೀಲ ವಸ್ತು ಹರಡುವುದಕ್ಕೆ ಸಂಬಂಧಿಸಿದಂತೆ ಮಾಹಿತಿ ತಂತ್ರಜ್ಞಾನ ಕಾಯ್ದೆಯ ಸೆಕ್ಷನ್ 67 ಅಡಿಗೂ ಪ್ರಕರಣ ದಾಖಲಾಗಿದೆ.

ಆರೋಪಿಗಳ ಬಂಧನಕ್ಕೆ ಪೊಲೀಸರು ಕಾರ್ಯಾಚರಣೆ

ಈ ಘಟನೆ ಸಂಬಂಧ ಆರೋಪಿಗಳನ್ನು ಶೀಘ್ರ ಬಂಧಿಸುವ ಪ್ರಯತ್ನಗಳು ನಡೆಯುತ್ತಿದ್ದು, ಪೊಲೀಸರು ತೀವ್ರ ತನಿಖೆ ನಡೆಸುತ್ತಿದ್ದಾರೆ ಎಂದು ಪಾಲನ್‌ಪುರ ತಾಲೂಕು ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.