ವಿವಾಹ ಭರವಸೆ ನೀಡಿ ಖಾಸಗಿ ವಿಡಿಯೋದಿಂದ ಬ್ಲ್ಯಾಕ್‌ಮೇಲ್‌: ಯುವಕನ ಬಂಧನ

ಬೆಂಗಳೂರು: ವಿವಾಹವಾಗುವ ಭರವಸೆ ನೀಡಿ ಖಾಸಗಿ ಸಂಬಂಧ ಬೆಳೆಸಿದ ಬಳಿಕ, ಆ ಸಂಬಂಧದ ವಿಡಿಯೋ ಬಳಸಿ ಹಣಕ್ಕಾಗಿ ಬ್ಲ್ಯಾಕ್‌ಮೇಲ್‌ ಮಾಡುತ್ತಿದ್ದ ಯುವಕನೊಬ್ಬನನ್ನು ಕಾಡುಗೋಡಿ ಠಾಣಾ ಪೊಲೀಸರು ಬಂಧಿಸಿದ್ದಾರೆ. ಬಂಧಿತನನ್ನು ಕಾಡುಗೋಡಿಯ ನಿವಾಸಿ ಶ್ರೀನಿವಾಸ್‌ ಎಂದು ಗುರುತಿಸಲಾಗಿದೆ.

ಆಂಧ್ರಪ್ರದೇಶ ಮೂಲದ ಮಹಿಳೆ ನೀಡಿದ ದೂರಿನ ಆಧಾರದ ಮೇಲೆ ಶ್ರೀನಿವಾಸ್ ವಿರುದ್ಧ ಪ್ರಕರಣ ದಾಖಲಾಗಿದೆ. ಸಂತ್ರಸ್ತೆ 2014ರಲ್ಲಿ ವಿವಾಹವಾದ ಬಳಿಕ ಕೇವಲ 2 ವರ್ಷ ಪತಿಯ ಜೊತೆ ಬದುಕಿದ್ದು, 2016ರಲ್ಲಿ ಕೌಟುಂಬಿಕ ಕಲಹದಿಂದ ವಿಚ್ಛೇದನ ಪಡೆದಿದ್ದರು. ವಿಚ್ಛೇದನದ ನಂತರ ಜೀವನ ಸಾಗಿಸಲು ಉದ್ಯೋಗ ಹುಡುಕುತ್ತಿದ್ದ ಮಹಿಳೆಗೆ ಕಾಡುಗೋಡಿಯ ಡಿಜಿಟಲ್ ಸೇವಾ ಕೇಂದ್ರದಲ್ಲಿ ಸ್ವಾಗತಕಾರಿಣಿಯಾಗಿ ಕೆಲಸ ಲಭಿಸಿತ್ತು.

ಈ ವೇಳೆ ಶ್ರೀನಿವಾಸ್‌ ಅವರೊಂದಿಗೆ ಪರಿಚಯ ಬೆಳೆಸಿದನು. ಕ್ರಮೇಣ ಅವನು ತನ್ನನ್ನು ಮದುವೆಯಾಗುತ್ತೇನೆ ಎಂಬ ನಂಬಿಕೆ ನೀಡಿದ. ಬಾಡಿಗೆ ಮನೆಯಲ್ಲಿ ಒಟ್ಟಾಗಿ ವಾಸವಿದ್ದ ಸಂದರ್ಭ ಮಹಿಳೆಯ ಅನುಮತಿ ಇಲ್ಲದೇ ಅವಳ ಖಾಸಗಿ ದೃಶ್ಯಗಳನ್ನು ಮೊಬೈಲ್‌ನಲ್ಲಿ ಚಿತ್ರೀಕರಿಸಿದ್ದ.

ನಂತರ ಅದೇ ವಿಡಿಯೋಗಳನ್ನು ತೋರಿಸಿ ಹಣಕ್ಕಾಗಿ ಪೀಡನೆ ಆರಂಭಿಸಿದ್ದ. ಬ್ಲ್ಯಾಕ್‌ಮೇಲ್‌ಗೆ ಆತಂಕಗೊಂಡ ಮಹಿಳೆ 25 ಗ್ರಾಂ ಚಿನ್ನ ಮತ್ತು 1 ಲಕ್ಷ ರೂಪಾಯಿ ನೀಡಿ ವಿಮುಕ್ತರಾಗಲು ಪ್ರಯತ್ನಿಸಿದ್ದರೂ, ಶ್ರೀನಿವಾಸ್ ತನ್ನ ವರ್ತನೆ ಬದಲಾಯಿಸದೆ ಮತ್ತೆ ಹಣಕ್ಕಾಗಿ ಬೆದರಿಕೆ ಮುಂದುವರಿಸಿದ್ದ.

ಇನ್ನುಳಿದಂತೆ, ಮಹಿಳೆಯ ಸಹೋದರನಿಗೆ ಕರೆ ಮಾಡಿ ಬೆದರಿಕೆ ಹಾಕಿದ್ದ ಶ್ರೀನಿವಾಸ್‌, ತನ್ನ ಹೆಸರಿನಲ್ಲಿ ನಕಲಿ ಫೇಸ್‌ಬುಕ್ ಖಾತೆ ತೆರೆದು ಖಾಸಗಿ ವಿಡಿಯೋಗಳನ್ನು ಅಪ್ಲೋಡ್ ಮಾಡಲು ಯತ್ನಿಸಿದ್ದ.

ಇನ್ನಷ್ಟು ದಿನಗಳ ಪೀಡನೆ ಸಹಿಸಲು ಸಾಧ್ಯವಾಗದ ಮಹಿಳೆ ಕಾಡುಗೋಡಿ ಪೊಲೀಸ್ ಠಾಣೆಗೆ ದೂರು ನೀಡಿದ ಬಳಿಕ ಪೊಲೀಸರು ಪ್ರಕರಣ ದಾಖಲಿಸಿ ಶ್ರೀನಿವಾಸ್‌ನನ್ನು ಬಂಧಿಸಿದ್ದಾರೆ.