ಹುಬ್ಬಳ್ಳಿ: ಸಮುದಾಯಿಕ ಸೌಹಾರ್ದಕ್ಕೆ ಕಲಂಕವಾಗುವಂತ ಘಟನೆ ಗುರುವಾರ ತಡರಾತ್ರಿ ಹುಬ್ಬಳ್ಳಿಯ ಹಳೇ ನಗರದಲ್ಲಿ ನಡೆದಿದೆ. ಕಿಚಡಿ ನುಭವವನ್ನು ವಿಕೃತಗೊಳಿಸಿ ಗಲಾಟೆ ಸೃಷ್ಟಿಸಿದ್ದ ಕೆಲ ಯುವಕರು, ಶಾಂತಿಯುತವಾಗಿ ಬುದ್ಧಿವಾದ ನೀಡಿದ್ದ ಜಮಾತ್ ಮುಖಂಡನ ಮೇಲೆ ಚಾಕುವಿನಿಂದ ಹಲ್ಲೆ ನಡೆಸಿ ಪರಾರಿಯಾದ ಘಟನೆ ನಾಟಕೀಯ ಬೆಳವಣಿಗೆಯಾಗಿ ರೂಪುಗೊಂಡಿದೆ.
ಈ ಘಟನೆ ಹಳೇ ಹುಬ್ಬಳ್ಳಿ ಪೊಲೀಸ್ ಠಾಣಾ ವ್ಯಾಪ್ತಿಯ ಬೇಪಾರಿ ಪ್ಲಾಟ್ ಪ್ರದೇಶದಲ್ಲಿ ಸಂಭವಿಸಿದೆ. ರವಿವಾರ ದಿನ ಮುಸ್ಲಿಂ ಸಮುದಾಯದವರಿಂದ ಆಯೋಜಿಸಲಾಗಿದ್ದ ಕಿಚಡಿ ವಿತರಣಾ ಕಾರ್ಯಕ್ರಮದಲ್ಲಿ, ಧಾರವಾಡ ಮೂಲದ ಅಲ್ತಾಫ್ ಹಾಗೂ ಆತನ ಗೆಳೆಯರು ಕ್ಷುಲ್ಲಕ ಕಾರಣಕ್ಕೆ ಗಲಾಟೆ ಉಂಟುಮಾಡಿದ್ದರು. ಇದರಿಂದ ಅಸಮಾಧಾನಗೊಂಡ ಜಮಾತ್ ಮುಖಂಡ ಸಾಧಿಕ್, ಗಲಾಟೆ ಮಾಡುತ್ತಿದ್ದವರನ್ನು ಶಾಂತವಾಗಿ ಬುದ್ದಿವಾದ ನೀಡಿ ಕಾರ್ಯಕ್ರಮದ ಶಿಸ್ತನ್ನು ಕಾಪಾಡಲು ಪ್ರಯತ್ನಿಸಿದ್ದರು.
ಆದರೆ ಈ ಮಾತಿಗೆ ಕೆರಳಿದ ಅಲ್ತಾಫ್ ಮತ್ತು ಆತನ ತಂಡ ಸೋಮವಾರ ರಾತ್ರಿ ಸುಮಾರು 12 ಗಂಟೆಯ ವೇಳೆಗೆ ಸಾಧಿಕ್ ಅವರ ಮೇಲೆ ಮುಂಚಿತ ಯೋಚನೆಯೊಂದಿಗೆ ದಾಳಿ ನಡೆಸಿ, ಚಾಕುವಿನಿಂದ ಹಲ್ಲೆ ಮಾಡಿ ಪರಾರಿಯಾಗಿದ್ದಾರೆ.
ಸಾಧಿಕ್ ಗಂಭೀರವಾಗಿ ಗಾಯಗೊಂಡ ಸ್ಥಿತಿಯಲ್ಲಿ ರಕ್ತದ ಮಡುವಿನಲ್ಲಿ ಬಿದ್ದಿದ್ದು, ತಕ್ಷಣದ ಚಿಕಿತ್ಸೆಗೆ ಹುಬ್ಬಳ್ಳಿಯ ಕಿಮ್ಸ್ ಆಸ್ಪತ್ರೆಗೆ ದಾಖಲಿಸಲಾಗಿದೆ. ವೈದ್ಯರ ಪ್ರಕಾರ ಅವರ ಸ್ಥಿತಿ ಸದ್ಯ ಸ್ಥಿರವಾಗಿದೆ.
ಈ ಘಟನೆ ಬೆನ್ನಲ್ಲೇ ಸ್ಥಳೀಯ ನಿವಾಸಿಗಳು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಅಪರಾಧಿಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿರುವ ಅವರು, ಹಳೇ ಹುಬ್ಬಳ್ಳಿ ಪೊಲೀಸ್ ಠಾಣೆಗೆ ಧಾವಿಸಿ ದೂರು ನೀಡಿದ್ದಾರೆ.
ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಆರೋಪಿಗಳನ್ನು ಪತ್ತೆ ಹಚ್ಚಲು ಕಾರ್ಯಾಚರಣೆ ಆರಂಭಿಸಿದ್ದಾರೆ. ಸಮಾಜದಲ್ಲಿ ಭಯೋತ್ಪಾದಕ ವಾತಾವರಣ ಉಂಟುಮಾಡುವಂತಹ ಈ ರೀತಿಯ ಗಂಭೀರ ಘಟನೆಗಳು ಮರುಕಳಿಸದಂತೆ ಕ್ರಮ ಕೈಗೊಳ್ಳಬೇಕೆಂದು ಸಾರ್ವಜನಿಕರು ಒತ್ತಾಯಿಸುತ್ತಿದ್ದಾರೆ.
