ಉನ್ನತ ವ್ಯಾಸಂಗದ ಕನಸು ಹೊತ್ತು ವಿದೇಶಕ್ಕೆ ತೆರಳಿದ್ದ ಉತ್ತರ ಪ್ರದೇಶದ ಯುವಕನ ಜೀವನ ಇದೀಗ ಸಂಪೂರ್ಣ ಬದಲಾಗಿದೆ. ಎಂಬಿಬಿಎಸ್ ಓದಲು ರಷ್ಯಾಗೆ ತೆರಳಿದ್ದ ಯುವಕನಿಗೆ ಅಲ್ಲಿನ ಮಹಿಳಾ ಪ್ರೊಫೆಸರ್ ಜೊತೆ ಪ್ರೀತಿ ಮೂಡಿದ್ದು, ಕೊನೆಗೆ ಇಬ್ಬರೂ ವಿವಾಹವಾಗಿದ್ದಾರೆ. ಇದೀಗ ದಂಪತಿ ರಷ್ಯಾದಲ್ಲೇ ಕ್ಲಿನಿಕ್ ನಡೆಸುತ್ತಿದ್ದು, ತಿಂಗಳಿಗೆ ಲಕ್ಷಾಂತರ ರೂಪಾಯಿ ಆದಾಯ ಗಳಿಸುತ್ತಿದ್ದಾರೆ ಎನ್ನಲಾಗಿದೆ.
ಒಂಟಿತನದ ನಡುವೆ ಪರಿಚಯವಾದ ಪ್ರೊಫೆಸರ್
ಉತ್ತರ ಪ್ರದೇಶದ ಲಖನೌ ಮೂಲದ ಯುವಕನೊಬ್ಬ ಸುಮಾರು ಎರಡು ವರ್ಷಗಳ ಹಿಂದೆ ಎಂಬಿಬಿಎಸ್ ವ್ಯಾಸಂಗಕ್ಕಾಗಿ ರಷ್ಯಾಗೆ ತೆರಳಿದ್ದನು. ಹೊಸ ದೇಶ, ಹೊಸ ವಾತಾವರಣ ಹಾಗೂ ಪರಿಚಯಸ್ಥರ ಕೊರತೆಯಿಂದ ಆರಂಭದಲ್ಲಿ ಆತ ಒಂಟಿತನ ಅನುಭವಿಸುತ್ತಿದ್ದ ಎನ್ನಲಾಗಿದೆ.
ಈ ಸಂದರ್ಭದಲ್ಲಿ ಕಾಲೇಜಿನಲ್ಲಿ ಬೋಧನೆ ಮಾಡುತ್ತಿದ್ದ ರಷ್ಯಾದ ವಿಚ್ಛೇದಿತ ಮಹಿಳಾ ಪ್ರೊಫೆಸರ್ ಜೊತೆ ಆತನಿಗೆ ಪರಿಚಯವಾಗಿದೆ. ಆರಂಭದಲ್ಲಿ ವೈದ್ಯಕೀಯ ವಿಷಯಗಳ ಕುರಿತು ಚರ್ಚೆ ನಡೆಸುತ್ತಿದ್ದ ಇವರಿಬ್ಬರ ಸ್ನೇಹ, ದಿನ ಕಳೆದಂತೆ ಆತ್ಮೀಯತೆಗೆ ತಿರುಗಿದೆ ಎನ್ನಲಾಗಿದೆ.
ಡೌಟ್ ಕೇಳುತ್ತಾ ಶುರುವಾದ ಸಂಬಂಧ ಮದುವೆಯಲ್ಲಿ ಅಂತ್ಯ
ವಿದ್ಯಾರ್ಥಿ ತನ್ನ ಪಾಠದ ಅನುಮಾನಗಳನ್ನು ಪರಿಹರಿಸಿಕೊಳ್ಳಲು ಪ್ರೊಫೆಸರ್ ಬಳಿ ಪದೇಪದೇ ಚರ್ಚೆ ನಡೆಸುತ್ತಿದ್ದನು. ಈ ಮಾತುಕತೆಗಳೇ ಕ್ರಮೇಣ ಇಬ್ಬರ ನಡುವೆ ಪ್ರೀತಿಗೆ ಕಾರಣವಾಯಿತು ಎನ್ನಲಾಗಿದೆ. ಪರಸ್ಪರ ಅರ್ಥಮಾಡಿಕೊಂಡ ಬಳಿಕ ಇಬ್ಬರೂ ವಿವಾಹವಾಗಲು ನಿರ್ಧರಿಸಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದಾರೆ.
ಮದುವೆ ಬಳಿಕ ಕ್ಲಿನಿಕ್ ಆರಂಭ
ವಿವಾಹದ ಬಳಿಕ ದಂಪತಿ ರಷ್ಯಾದಲ್ಲೇ ಸ್ವಂತ ಕ್ಲಿನಿಕ್ ಆರಂಭಿಸಿದ್ದಾರೆ ಎನ್ನಲಾಗಿದೆ. ವೈದ್ಯಕೀಯ ಕ್ಷೇತ್ರದಲ್ಲಿ ವೃತ್ತಿಜೀವನ ಮುಂದುವರಿಸಿರುವ ಈ ಜೋಡಿ, ತಿಂಗಳಿಗೆ ಸುಮಾರು ₹2ರಿಂದ ₹3 ಲಕ್ಷ ಅಥವಾ ಅದಕ್ಕಿಂತ ಹೆಚ್ಚಿನ ಆದಾಯ ಗಳಿಸುತ್ತಿದ್ದಾರೆ ಎಂಬ ಮಾಹಿತಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.
ತಮ್ಮ ಜೀವನದ ಅನುಭವವನ್ನು ಹಂಚಿಕೊಂಡ ಯುವಕ, “ಜೀವನದಲ್ಲಿ ಸೆಟಲ್ ಆಗಬೇಕೆಂದರೆ ಜಮೀನು ಮಾರಿ ರಷ್ಯಾಕ್ಕೆ ಬಂದು ಓದಿ, ರಷ್ಯನ್ ಮಹಿಳೆಯನ್ನು ಮದುವೆಯಾಗಿ ಜೀವನ ರೂಪಿಸಿಕೊಳ್ಳಿ” ಎಂದು ತಮಾಷೆಯಾಗಿ ಹೇಳಿಕೊಂಡಿದ್ದಾನೆ ಎನ್ನಲಾಗಿದೆ.
ಯುವಕನ ಜೀವನದಲ್ಲಾದ ಈ ಅನಿರೀಕ್ಷಿತ ತಿರುವಿನ ಕಥೆ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ನೆಟ್ಟಿಗರು ತಮ್ಮದೇ ರೀತಿಯಲ್ಲಿ ಪ್ರತಿಕ್ರಿಯಿಸುತ್ತಿದ್ದಾರೆ.
