ಕೇರಳದಲ್ಲಿ ಮಾದಕ ವಸ್ತುಗಳ ಬಳಕೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದ್ದು, ಈ ವ್ಯಸನ ಇದೀಗ ಶಾಲಾ ಮಕ್ಕಳಿಗೆ ತಾಕಲಾಟವಾಗುತ್ತಿರುವ ಧಾರುಣ ಸತ್ಯ ಬೆಳಕಿಗೆ ಬಂದಿದೆ. ರಾಜ್ಯ ಅಬಕಾರಿ ಇಲಾಖೆಯ ವರದಿಯಂತೆ, ರಾಜ್ಯದ 104 ಶಾಲೆಗಳಲ್ಲಿ ಡ್ರಗ್ಸ್ ಬಳಕೆ ಆತಂಕಕಾರಿಯಾಗಿ ಹೆಚ್ಚಿದ್ದು, ಈ ಶಾಲೆಗಳನ್ನು ಮಾದಕ ವಸ್ತುಗಳ ಹಾಟ್‌ಸ್ಪಾಟ್‌ಗಳೆಂದು ಗುರುತಿಸಲಾಗಿದೆ.
ಅಭ್ಯಾಸವಿಲ್ಲದ ವಯಸ್ಸಿನಲ್ಲೇ ವಿದ್ಯಾರ್ಥಿಗಳು ಡ್ರಗ್ಸ್ ಬಳಕೆ ಮಾಡುತ್ತಿರುವುದು ಗಂಭೀರ ಸಮಸ್ಯೆಯಾಗಿ ಪರಿಣಮಿಸಿದೆ. ಈ ಪೈಕಿ ತಿರುವನಂತಪುರಂ ಜಿಲ್ಲೆ ಅತ್ಯಂತ ಹೆಚ್ಚಾದ ಪ್ರಕರಣಗಳನ್ನು ದಾಖಲಿಸಿದ್ದು, ಇಲ್ಲಿಯ 43 ಶಾಲೆಗಳು ಡ್ರಗ್ಸ್ ಬಳಕೆಯ ಕೇಂದ್ರಬಿಂದುವಾಗಿವೆ. ಎರ್ಣಾಕುಲಂ ಮತ್ತು ಕೋಜಿಕೋಡ್ ಜಿಲ್ಲೆಗಳ ಶಾಲೆಗಳು ಮುಂದಿನ ಸ್ಥಾನಗಳಲ್ಲಿ ಇವೆ.
ಈ ತೀವ್ರ ಪರಿಸ್ಥಿತಿಗೆ ಪ್ರತಿಕ್ರಿಯೆ ನೀಡಿದ ಶಿಕ್ಷಣ ಇಲಾಖೆ, ದುರುಪಯೋಗ ಹೆಚ್ಚಿರುವ ಶಾಲೆಗಳನ್ನು ಪ್ರತ್ಯೇಕವಾಗಿ ಗುರುತಿಸಿ ಕ್ರಮ ಕೈಗೊಳ್ಳುತ್ತಿದೆ. ಅಬಕಾರಿ ಇಲಾಖೆ ಮತ್ತು ಪೊಲೀಸ್ ಇಲಾಖೆ ಸೇರಿ ಸಂಯುಕ್ತ ಕಾರ್ಯಾಚರಣೆಗಳು ಆರಂಭವಾಗಿದ್ದು, ಡ್ರಗ್ಸ್ ವ್ಯಾಪಾರವನ್ನು ತಡೆಗಟ್ಟಲು ಎಲ್ಲ ರೀತಿಯ ಕ್ರಮಗಳನ್ನು ಜಾರಿಗೊಳಿಸಲಾಗುತ್ತಿದೆ.
ಇನ್ನು ಮುಂದೆ ಈ ಶಾಲೆಗಳನ್ನು ನಿರಂತರ ನಿಗಾವಹಿಸುವ ಕ್ರಮ ಕೈಗೊಳ್ಳಲಾಗಿದ್ದು, ಡ್ರಗ್ಸ್ ಮಾರಾಟಗಾರರನ್ನು ಗುರುತುಪಡಿಸಲು ಜಾಗೃತ ಕಾರ್ಯಾಚರಣೆಗಳು ನಡೆಯುತ್ತಿವೆ. ವಿದ್ಯಾರ್ಥಿಗಳಲ್ಲಿ ಜಾಗೃತಿ ಮೂಡಿಸಲು ಸೃಜನಶೀಲ ಕಾರ್ಯಕ್ರಮಗಳೂ ರೂಪುಗೊಳ್ಳುತ್ತಿವೆ.
